"A Caverna" (poema 5)

Afastou o cabelo de diante da faciana para despois queimalo con tinte loiro platino. Orson explicoullo: era preciso acabar con Gilda,

necesitaba asasinar a Gilda.

Gilda non era a protagonista da súa película.

Rita albergaba a súa propia versión dos feitos:

"Men fell in love with Gilda but they wake up with me". Espertan tristes. Todos espertan tristes. El tamén.

Logo do desastre,

observou con lentitude a dama de Shanghai, multiplicada a través dos espellos, lista para dar lume co seu revólver.

No seu novo traxe de muller fatal veuse tan distinta e tan igual que non puido máis que pensar

na fatalidade do seu destino.

Foi entón cando o director berrou "Acción"

e ela non tivo máis remedio que disparar. Natalia Alonso Ramos (2019)

De A síndrome de Hayworth. Medulia Editorial