"Come back"

Non creo nos armisticios

nin na gruta de ouro que vive

na palabra amor.

Non creo na inocencia do teu rostro

nin tampouco na sublime redención

que anuncian os teus ollos:

florete de luz

que convoca ás gaivotas

para o seu regreso

cando a treboada se afasta do mar

e na area aínda permanecen

as últimas pingas.

Natalia Alonso Ramos

De 'Un feixe de poesía na porta' (2013). Q de Vian Cadernos.