"Searching for something"

A casa,

os tomates verdes madurando a carón da fiestra,

o cheiro intenso do verniz sobre a madeira,

e os paxaros,

e os cans que aparecen nada máis abrir a porta,

mesmo antes de que saia o sol,

coa lingua de fóra

e un espello de auga doce

acubillado na cunca dos ollos.

O tic-tac do reloxo,

a disciplina dos soldados,

o útero das horas,

o falo dos segundos.

A pintura non figuratuva das moscas,

o tusido ocasional dalgún motor,

a elegancia flamíxera das espigas,

unha onda de murmurios opacos

pronunciada de folla en folla,

palabras que eu non podo discernir,

pero si admirar,

o sorriso morno do mudo Singer,

porque el sempre me saberá comprender.

Natalia Alonso Ramos

Fragmento dun poema publicado na Revista Lucense de Creación Poética Xistral (2015)